घरमाथी रुख ढल्दा च्यापिएर एक महिलाको मृत्यु,एक घाइते

महेन्द्रनगर । कञ्चनपुरको बेदकोट नगरपालिका–३ स्थित पेलितालमा घरमाथी रुख ढल्दा एक महिलाको मृत्यु भएको छ भने अर्की एक महिला घाइते भएकी छन ।
जिल्ला प्रहरी कार्यालय कञ्चनपुरका अनुसार गएराती स्थानीय कुलबहादुर महताको टायलले छाएको कच्ची घरमाथि घर नजिकै रहेको कुसुमको रुख ढल्दा घर भत्किएपछि घरभित्र रहेका ५० वर्षीया सारदा देवी महताको मृत्यु भएको हो । महताको घटनास्थलमै मृत्यु भएको जिल्ला प्रहरी कार्यालय कञ्चनपुरका डिएसपी हेमबहादुर शाहीले जानकारी दिए । सोहि घरभित्र रहेकी उजिर सिंह महताकी ४० वर्षीया श्रीमती सीता महता घाइते भएकी छन । उनको टाउको तथा शरीरका विभिन्न भागमा चोट लागेको छ । महाकाली प्रादेशिक अस्पतालमा उपचार हुन नसकेपछि थप उपचारका लागि भारत रिफर गरिएको प्रहरीले जनाएको छ ।